2Ti 1 | MED | STEP | Ya mon kᵾⱡ, na Pol Got ndi, pilinga mor ei. Kraist Jisas nga kitip kᵾni wu ndi, ya Kraist Jisas kᵾn rᵾp ropᵾn moⱡpᵾn, uⱡ nga kᵾnt nga kont mul uⱡ ei, wote Got kᵾn timin ei nga, ik nangga nᵾk, tᵾk mundrᵾng wu ei ndi, mon ei rop, Timoti na nga kangᵾm kang tenda ei kᵾn ngont. Got Tipam kᵾn, wote tᵾn nga Nuim Kraist Jisas raⱡ nga wamp poⱡ ti uⱡ ei kᵾn, kont kuⱡi uⱡ ei kᵾn, wote moⱡpa kundi uⱡ kᵾⱡ, nim kᵾn kan piyangga!

2 Timothy 1

Pol Ndi, Timoti Mon Akil Tepa Ropa Ngurum Ei

1 Ya mon kᵾⱡ, na Pol Got ndi, pilinga mor ei. Kraist Jisas nga kitip kᵾni wu ndi, ya Kraist Jisas kᵾn rᵾp ropᵾn moⱡpᵾn, uⱡ nga kᵾnt nga kont mul uⱡ ei, wote Got kᵾn timin ei nga, ik nangga nᵾk, tᵾk mundrᵾng wu ei ndi, mon ei rop, Timoti na nga kangᵾm kang tenda ei kᵾn ngont. Got Tipam kᵾn, wote tᵾn nga Nuim Kraist Jisas raⱡ nga wamp poⱡ ti uⱡ ei kᵾn, kont kuⱡi uⱡ ei kᵾn, wote moⱡpa kundi uⱡ kᵾⱡ, nim kᵾn kan piyangga!

Timoti Nga Mondpa Pili Orunga Nimba Ronduⱡ Mundrum

3 Na nga anda kouwᵾmᵾn kᵾⱡ, Got pep rorung ei mel ku, na pep ront. Na Got kᵾn rumbuldi rᵾnggilmᵾ raⱡ, angge nimp atinga rop, nim pilip ku et. 4 Na nim nga ka mong ni kᵾⱡ, tᵾpa pinditim ei kᵾn, na nim omp kandᵾp kᵾn ambᵾⱡᵾp paⱡᵾp moⱡamp ka ei nᵾmp pᵾt. 5 Nim nga mondpa pili kun kai ei, na pilip mint mor. Mondpa pili ei, unt nim nga manᵾm nga manᵾm amp Lowis kᵾn, wote nim nga manᵾm amp Yunis kᵾn, mondᵾk pᵾtᵾnggil ni mel ku, akup na pᵾnt ei, nim kᵾn tetᵾm ku. 6 Uⱡ puⱡ ei nga, na nim kᵾn ronduⱡ mundᵾp nᵾnt. Na ndi, nim ki oⱡa ndupa memp pendpa atinga roⱡᵾmba, Got nga ronduⱡ ti tᵾtᵾn ni, akup ronduⱡ mundkᵾn ᵾmbᵾⱡi! 7 Got ndi, tᵾl Muⱡnga Wingti ngurum ni, tᵾl mel ti nga mundmong itimbil nimba ngui ngᵾnggᵾrᵾm. Ei mon! Muⱡnga Wingti ei ndi, tᵾl ronduⱡ ngumba, wamp numan ngui uⱡ ei ngumba, wote numan kai ei ngumba etᵾm.

8 Nim Got nga Rᵾnang Ik Kai nin ei nga, pipil kuⱡi nᵾⱡi! Wote na ya, Got nga kongun ila nᵾmp kan manga pit ei nga, pipil kuⱡi nᵾⱡi mon ku. Ei mon! Nim Got ndi, ronduⱡ ngurum ni, tekᵾn molkᵾn, Got nga Rᵾnang Ik Kai kᵾⱡ nga, na mbun koma ronduⱡ mundᵾp, koma ront. Ei mel, nim i ku etkᵾn koma rui! 9 Got ndi, tᵾn etpa, peng kont tᵾpa omba, tᵾn elim nga wamp mbᵾ nᵾtᵾm ei, tᵾn nga uⱡ kai etmin nimbila mon. Got ndi, uⱡ etᵾm ei, elim nga numan ila, wote elim nga wamp poⱡ ti uⱡ ila mint etᵾm. Muⱡ mᵾi raⱡ iti nᵾti kᵾn, Got nga wamp poⱡ ti uⱡ ei, Jisas Kraist kᵾn to ropa, tᵾn wamp mbᵾ ngurum. 10 Wote, akup tᵾn nga Etpa Ti Wu Kraist Jisas ei ndi, uⱡ mbᵾ etpa tᵾpa, pena ila pinditim kᵾndᵾrmᵾn. Wamp kuⱡi peng ei nga ronduⱡ ei, ropa mana ndupa, wote Rᵾnang Ik Kont mba mul uⱡ ei tᵾpa, pena ila pendᵾtᵾm.

11 Got ndi, elim nga Rᵾnang Ik Kai ei, na ik mbo wu moⱡᵾp, wote elim nga nombuⱡa rung wu muⱡeimp nimba na kandpa titim. 12 Uⱡ puⱡ ila mint, na mindil ou ndupa nont. Wote, ei nga nᵾmp, na wak rui nᵾrimp. Ei nambuⱡ emel, na Got mondᵾp pilip, tᵾp ou ndup et wu ei ndi, Nuim yant omba Ui Ou ila, na etpa peng kont tᵾmba. 13 Na ik kupa mat, nim mbo indᵾt nimbᵾ, ambulkᵾn gi ndukᵾn, pep rokᵾn, mondpa pili uⱡ ei kᵾn, wote wamp numan ngui uⱡ raⱡ, Kraist Jisas kᵾn tekᵾn muⱡi! 14 Uⱡ kai mat, Muⱡnga Wingti nga ronduⱡ ei ndi, tᵾn ngurum ei, akup nim kᵾn tetᵾm nimbᵾ, ambulkᵾn gi ndui!

15 Nim pilik morᵾn ei, ya Eisiya kona ila wamp nimbᵾ, na wak rok porung. Wote, wu Pigelas kᵾn Ermoginis raⱡ kunda, na wak rok purᵾnggil. 16 Wu Nuim ei ndi, wu Onisiporas kᵾn, elim nga wamp mbo tenda kᵾⱡ, etpa numan wang ndangga. Ei nambuⱡ emel, na kan manga pit ei nga, pipil kuⱡi naⱡᵾpa, na nga numan orunga etpa, ndoimp rundrum. 17 Wote, Rom kona ila urum ei kᵾn, na andpa kurpa, wote kandpa titim. 18 Wu Nuim ei ndi, Nuim yant omba Ui Ou ila, wu Onisiporas kandpa kont kuⱡangga! Nim pilik morᵾn ei, Episis kona ila, na wu ei ndi, minal tᵾpa rapᵾndrᵾm.